معاناة زوجة

حكايتي ممكن تلاقيها حصلت ليك او حصلت لاختك او قريبتك... حكاية كل يوم بنعيش فيها ... عشت معاناه كبيرة وصړاعات كتير.. اسمحولي مش هقول على اسمي بس لو انتم مصرين ممكن تسموني سحړ حكايتي بدأت بعد ما نقلنا من بيت العيلة لبيتنا الجديد بسنة تقريبا جه اتقدملي شاب كان جارنا.. هو كان شاب محترم جدا .. ربنا اراد ان يبقى فيه ارتباط بينا.. اتخطبنا بسرعة واتفقنا ان بعد سنة هنتجوز.. عدى شهور على الخطوبة وكان كويس جدا معايا وحتى اهله كانوا كويسين جدا.. مامته كانت بتعاملني انا واهلي بشكل محترم جدا.. واخواته البنات كمان... بس هو اخواته صاعبين شوية في الطباع.. يعني هما اربع بنات .. اتنين متجوزين وعايشين مع اجوازهم.. واحده متجوزه في البلد هما اصلا من المنصورة... ودي مبتجيش كتير .. والتلاته الباقيين دايما في بيت ابوهم.. هما اتنين عايشين مع امهم في نفس البيت حتى بأجوازهم الاتنين... والتالته قاعده مع جوزها بس بتيجي كتير ليهم... طباعهم كانت صعبه اوي وحتى عمتي قالتلي في يوم الخطوبة انتي هتعيشي معاهم ازاي يا بنتي.. دول شكلهم بنات لافه ومش ساهلين ... انا قولت لنفسي انا مالي بيهم انا هاعيش مع جوزي مش معاهم... وحتى ماما واخواتي قالوا كده..

المهم عدى فترة كبيرة من الخطوبة.. والفرح كل يوم بيقرب.. بقى فاضل شهرين على الفرح... روحت انا وماما نشتري السجاد .. ويومها لقيت محمد خطيبي بيتصل بيا وبيقولي ماما عايزه تكلمك يا سحړ.. كلمت ماما وسلمت عليا وقالتلي
انتي رايحه تشتري السجاد صح
ايوة يا ماما رايحه انا وماما بكرة
طيب ماتبقيش تجيبي السجاد خيش 
مفهمتش الجملة فاستفسرت منها اني مش فاهمه.. فضلت بقى تقولي على نوع معين اجيبه كأني مش فاهمه حاجة وتقولي اوعي تجيبي كذا وكذا.. انا اضايقت لان مش من حقهم انا مابقولش لابنهم جيب لي النوع الفولاني من كذا ... هو مجهز شقته على زوقه وماليش دخل فيها.. يومها زعقنا وماما كلمتهم وقالتلهم احنا مش جايين من كذا واحنا

فاهمين احنا هنجيب ايه .. وكلام من ده... الموضوع ده خلص وجه اللي العن من كده... فستان الفرح والكوافير... روحت انا وماما واختي نشوف الفساتين مع بنت خالتي... اختارت فستان .. وبعدها شوفنا الكوافير وشوفنا اسعاره.. اول ما قولت لمحمد علي سعر الفستان وسعر الكوافير لقيته حرفيا اتقلب 180 درجة! صوته علي وقالي انا مش هرمي فلوسي على الكلام ده وووو... زعلنا مع بعض وقفلنا... مر كام يوم عشان بعدها الاقي اخته بتتصل بيا.. اخته دي اصلا كوافيرة.. المهم قالتلي انا هجيب لك الفستان يا ستي وانا اللي همكيجك! قولتلها طبعا لأ ماينفعش اهل العريس يشوفو العروسه غير يوم الفرح...