في السابعة صباحا

نامت وطلبت اني افضل معاها 
عدا كذا يوم وانا علاقتي ب رونزي بتكبر عن اليوم اللي قبله فهمت إن مامتها اټوفت بسبب حاډثه وغالبآ نفس الحاډثه دي اللي كانت السبب في عجز يوسف.. 
وعرفت كمان ان العبه المفضله عند مامتها الشطرنج عشان كدا رونزي بتحب تلعبها وعشان كدا كان بيسألني إذا كنت بعرف العب العبه دي ولا لاء 

كان اب عظيم حنين وجميل اوقات كنت بغير من رونزي انها عندها اب حنين عليها وبيحبها الحب ده كله يا بختها بيه 
وبرغم عجزه لاكنه ناجح على طول مشغول وراه اجتماعات وعمره ما طلب مني اي مساعده من وقت ما جيت البيت لاكن كان بينبسط لما بيلاقي علاقتي ب رونزي كويسه 
كنت قاعده بحكيلها حكاية علاء الدين والاميره ياسمين قبل النو
_وبس كدا ياستي اعترف علاء الدين انه مش امير ولا حاجه بس بيحب ياسمين فا ياسمين وافقت تتجوزه وهو مش امير وعاشوا في تبات ونبات 
_بس هو ينفع اميره تتجوز واحد عادي يا روز 
_اكيد ينفع 
_بس هو فقير يعني مش هيديها فلوس ولا دهب وهي اميره لازم تاخد الحاجات دي 
_صح مظبوط بس عارفه بقا هو ادها اي اهم من كل دول
_اي 
_ادها قلبه 
_يعني اي 
_يعني بيحبها والحب هو اللي بيعيش يا رونزي مش الفلوس 
_صح بس انا ليه مش اسمي ياسمين 
_انتي اسمك احلى اصلا اسمك مميز 
_بجد!
_ااه طبعآ بجد 
_انا بحبك جدا
_وانا قد الدنيا بس يلا ننام بقا 
_حاضر تصبحي على خير يا روزتي 
_وانتي من اهل الخير يا أميرة الاميرات 
خدت في إيدي الكتاب وجيت اخرج من الاوضه لقيته قدام باب الاوضه قفلت النور وخرجت براحه
_حضرتك هنا من بدري
_امم
_طيب تأمر ب اي حاجه
_قهوه عايز قهوه عشان مصدع 
_عيني حاضر 
قولتها وحطيت الكتاب في المكتبه وروحت المطبخ وقفت اعمل القهوه دقايق ودخل ورايا وهو بيقول 
_متبقيش تحكي للبنت حكايات كلها رومانسي
_تحب احكيلها اي نوع من القصص
_الواقعيه بلاش شغل الخيال ده والنهيات السعيده مش كل نهاية قصه لازم تبقا سعيده ويعيشو في تبات ونبات 
_بس دي بنت يعني مش هحكي عن حاجات حزينه ولا حاجات اكشن اكيد هحكي عن الاميرات 
_خلينا في النص عشان مش عايزها تتعمق في الخيال وتكبر وتحب ومتالقيش قصتها زاي قصة الحواديت عشان زاي ما قولتلك مش كل النهايات سعيده 
_حاضر بس لو الحب صادق هيبقا احنا اللي ب إيدينا نخلي النهايه سعيده..
_ما علينا الأسبوع الجاي عندي شغل في تركيا وهتيجي معايا عندك مانع
عيني لمعت وهو بيتكلم وبكل تلقائيه قولت 
_طبعآ اجي معاك ده انت لو روحت من غيري ھقتلك 
_نعم!!
_قصدي يعني اكيد مع حضرتك يا استاذ يوسف 
_تمام 
_بس انا معنديش جواز السفر والحاجات دي 
_انا هتصرف
_تمام 
قدمت ليه القهوه و..
عدا اسبوع وكان جهز كل حاجه تخص السفر وانهارده كان اليوم اللي هنسافر فيه 
جهزت الشنط وجهزت رونزي وكل حاجه هنحتاجها واتجهنا للعربيه اللي هتوصلنا للمطار 
وبعد نص ساعه كنا في الطياره انا ورونزي جنب بعض وهو قدامنا 
كنت اول مره اركب فيها طياره في حياتي احساس ب الخۏف والفرحه في نفس الوقت قطع خۏفي صوترونزي وهي بتقول 
_احكيلي حدوته 
_حاضر يا عيوني 
فتحت شنطتي طلعت منها قصة سندريلا وبدأت احكي كان عينو عليا مراقب طريقتي في الحكي مراقب حركات شفايفي كنت متوتره متلغبطه مش عارفه احكي لحد ما رونزي عملت فيا جميل ونامت في نص الحكايه 
شيلت القصه تاني في شنطتي واتنهدت وسرحت ب خيالي في السما 
بيبقا اسوء وقت لما بسيب نفسي ل دماغي بفكر في حاجات كتير اوي بفكر في اللي ظلموني والي زعلوني وكل ذكرياتي الوحشه بقالي فتره بحاول انسى اللي حصلي في القريه بس دماغي مش سايبني في حالي 
ومن كتر التفكير محستش ب الوقت لدرجة اني فوقت على صوتو وهو بيقول 
_يلا وصلنا 
بصيت ليه وانا مبتسمه وعيني بتلمع
_يعني احنا كدا في تركيا
_امم
مجاش في بالي غير الكوميك بتاع إن البنت اتجوزت ثري عربي وخليته يوديها شهر عسل في تركيا واول ما نزلو من الطياره قالتلو طلقني 
بصيت ليه وانا مبتسمه وكلي حماس وقولتلو 
_طلقني 
رفع حجبه وبصلي ب استغراب وهو بيقول 
_نعم !!
_لاء لاء انا اسفه والله بس عشان لسه صاحيه مفوقتش اسفه جدا 
_حصل خير هاتي رونزي ويلا 
_حاضر 
خدت رونزي في إيدي ومشينا وراه كان فيه كذا حد بيساعده يخرج من الطياره لاكن كان باين عليه انه مضايق مش عايز حد يساعده مش عايز الناس تتعامل معاه على انه عاجز !
نزلنا من الطياره وركبنا العربيه مع مساعدة الشباب برضو وشويه ووصلنا للبيت اللي هنعيش فيه 
كنت مستمتعه بكل حاجه في البلد الأجواء تجنن 
البيت زاي اللي بنشوفو في المسلسلات بظبط